Abogada patay sa ambush

CEBU, Philippines - Usa ka abogada ang patay samtang naangol ang kauban niining usa usab ka abogado ug sekretaryo sa namatay human sila gi-ambush sa wa mailhing mga lalaking luwan og motorsiklo diha sa Catalina St. sa Barangay Looc , dakbayan sa Mandaue kagabii.

Ang nakalas mao si Atty. Amelie Ocañada Alegre  kinsa nabulit og samad pinusilan sa iyang ulo ug kalawasan ug patay dihadiha sa iyang gilingkoran samtang naigo sa iyang tuong dapidapi si Atty. Briccio Boholst ug ang sekretaryo nga si Anthony Pino naigo usab sa iyang tiyan.

Samtang nakaikyas ang duha ka wala mailhing mamumuno nga luwan sa usa ka itom nga motorsiklo nga  nagsul-ob og itom nga jackets ug full-faced helmets padung ngadto sa direksyon sa Mandaue-Mactan Bridge.

Matud pa ni Chief Inspector Michael Anthony Bastes, hepe sa Investigation and Detective Management Branch sa Mandaue City Police Office, ang tulo luwan sa usa ka BMW nga awto nga gipanag-iya ni Alegre.

Sumala pa gikan pa nag-meeting sa ilang law firm sa Brgy. Tipolo ang tulo  ug padung na untang ihatud si Boholst diha sa balay niini sa nahitaboan.

Base sa pasiunang impormasyong nadawat sa kapolisan, kalit nga gituparan sa mga mamumuno ang awto sa mga biktima ug gipaulanan sila og bala.

Base sa report sa dyAB kagabii gikan kang SPO4 Marcos Noval sa IDMB, human gipaulanan og bala ang sakyanan, nakadagan pa kini og 40 ka metros una pa nihunong. Si Atty. Boholst nakalayat na sa sakyanan.  Nakuha sa crime scene ang pito ka mga basiyo sa bala sa .9mm nga gituohang gikan sa armas sa mga mamumuno.

Si Boholst ug Alegre managkauban sa Boholst, Ocañada, Herrera, Remedio Law Firm ug giingong naanad na sila nga maghinatoray sa ilahang mga balay. Matud pa nga si Boholst wa magdala sa iyang sakyanan tungod kay walay kaparkingan sa ilang opisina.

Si Boholst ug si Pino daling gidala sa Cortes General Hospital apan gibalhin sa laing pribadong tambalanan.

Padayon pa karon ang imbestigasyon sa kapolisan pagtino sa motibo ug pag-ila sa mga suspek. (BANAT NEWS)