3 Mayor supak terminal ibalhin

CEBU, Philippines - Supak ang tulo ka mayor sa kasadpang bahin sa probinsiya sa Sugbo sa plano ni Gob. Hilario Davide III nga ibalhin ang Cebu South Bus Terminal.

Sila si Malabuyoc Mayor Lito Narciso Creus, Asturias Mayor Allan Adlawan ug Pinamungajan Mayor Glenn Baricuatro nipadayag nga hasol ug dugang gasto sa ila’ng mga konstituwente nga nanginabuhi sa dakbayan sa Sugbo.

Matud ni Baricuatro nga labi’ng maapektuhan ang mga nanarbaho sa construction nga matag semana mouli agi sa CSBT. Subli’ng gipadayag ni Davide nga kinahanglan mabalhin ang CSBT agi og pag-uyon sa tinguha ni Cebu City Mayor Michael Rama aron dili na maghuot ang kasamtangang nahimutangan niini.

Si Baricuatro niingon nga kaniadto gisaway ni Davide ang P5 nga terminal fee nga gipatuman sa administrasyon ni kanhi gobernador Gwendolyn Garcia tungod kay dugang kini’ng gasto sa taga probinsiya.

“Supak mi anang pagbalhin sa terminal kay nagdugang lang na sa kalisud sa mga commuters gikan diri sa south,” matud ni Creus.

Usa sab sa nabalak-an ni Adlawan ang mga tiguwang nga pasahero nga magbalhin-balhin og sakay gikan sa terminal padulong sa ila’ng destinasyon. (BANAT NEWS)