Nangomedya, mekaniko, laing usa gipusil patay

CEBU, Philippines - Patay ang usa ka construction worker tungod sa komedya sa pagsagol sa gimasa nga semento sa kape niadto’ng Martes sa hapon barangay Bangbang, Cordova.

Si Police Officer 1 Rocelito Andales sa Cordova Police Station niila sa namatay nga si Junrey Alegres, 26, samtang ang nagpusil mao si Darrel Belen Nolasco, 30, pulos taga barangay Ibabao.

Matud ni Andales nga nag-order og init nga kape ang suspek apan diha’ng gidawat nireklamo kay bugnaw ang tubig nga gibutang.

Ang biktima nga nagmasa og semento ang nitubag nga maayo pa og sagulan na lang og semento.

Kini ang nakapaulbo sa kasuko ni Nolasco hinungdan sa mainitong panaglalis hangtud nagsinumbagay apan gilupig ang suspek ug nipauli sa balay.

Paglabay sa pipila ka gutlo nibalik ang suspek nga nagdala na og armas ug gipusil ang biktma sa makadaghang higayun sa ulo ug ubang bahin sa kalawasan.

Samtang patay na nga nadangat sa Talisay District Hospital ang usa ka mekaniko human gipusil sa San Roque proper pasado alas 9 kagahapon sa buntag.

Giila ang biktima nga si Roque Abarquez, 45, minyo ug nagpuyo sa mao’ng dapit.

Matud ni Police Officer 1 Victor Largo, imbestigador sa Talisay City Police Station, nga nagsakay sa motor ang biktima diha’ng giatangan ug gipusil.

Nakahigayun pa unta sa pagdagan si Abarquez apan gigukod ug gipusil sa likod makaduha ka higayun nga nilapos ang usa ka bala sa dughan.

Sa imbestigasyon sa kapolisan nasayran nga daghang naglagot nga mga kustomer sa biktima gumikan kay mangayo og bayad nga dili maayo ang sakyanan samtang ang uban ilisan og pisa.

Patay sab ang usa ka tawo nga gipusil sa silingan sa barangay Looc, dakbayan sa Danao alas 2 pasado kagahapon sa kadlawon.

Si Police Officer 3 Nelson Pantoja sa Danao City Police Station niila sa namatay nga si Joseph Castro ug ang suspek nailhan nga si Mark Banzon.

Diha sa gawas sa panimalay ang biktima nga nakig-estorya sa silingan ug ang suspek nga nagsakay og motorsiklo ang kalit lang niabot.

Nagdali nga niduol ang suspek dayun pusil sa makadaghang higayun sa ulo ug dughan nga nakaingon sa hinanali nga kamatayun sa biktima.(BANAT NEWS)