Magtiayon patay sa bangga

CEBU, Philippines - Managtiayon nangamatay human napunggit ilang gisakyang motorsiklo sa usa ka Libyan national nga tinun-an sa pagka-piloto nga nagmaneho og sports utility vehicle kagahapon sa buntag diha sa circumferential road sa Mactan, dakbayan sa Lapu-Lapu.

Ang nangamatay mao sila si Joselito Urot, 49 , ug Suzette Urot, 39 anyos residente sa Sitio Kauswagan, Brgy. Bankal. Dead on arrival ang duha sa Mactan Doctor's Hospital.

Samtang ang suspetsado mao si Haitm Omer Ammar, 27, estudyante sa usa ka flying school ug temporaryong nagpuyo sa usa ka resort sa Brgy. Punta Engaño sa maong dakbayan.

Matud ni Police Officer 1 Jennifer Decatoria, imbestigador sa Lapu-Lapu City Police Office- Traffic Division padung ihatud ni Joselito si Suzette sa trabahuan niini sa Lear Corporation, Mactan Economic Processing Zone 1 luwan sa ilang motorsiklo.

Samtang si Ammar luwan sa iyang Subaru Hatchback (AIR 230) gikan sa Brgy. Pusok padulong sa gipuy-ang resort.

Matud pa ni Decatoria, samtang nagdagan ang sakyanan kalit nga napunta sa  kasugat nga lane si Ammar ug napunggit ang mga biktima ug nangalagpot sa karsada.

Nigawas usab sa imbestigasyon, nga human sa hitabo daling nanaog si Ammar ug gilangkat ang plate number sa iyang sakyanan.

Miinsister hinuon si Ammar nga ang mga biktima maoy nibangga kaniya, apan gialkontra kini sa usa ka saksi nga drayber og pasaheroan nga nagsunod sa mga biktima atol sa pagkahitabo.

Gibutyag usab ni Decatoria nga ang plate number sa sakyanan sa suspek gialarma usab duha ka semana na ang nakalabay human nakadasmag apan niikyas. (BANAT NEWS)