Nasunugan sa San Roque ipakonsulta
CEBU, Philippines – Gihangyo sa konseho sa dakbayan sa Sugbo ang Division for the Welfare of the Urban Poor (DWUP) nga mopresentar sa desinyo sa duha ka andana nga kapuy-an sa 120 ka pamilya nga nasunugan sa barangay San Roque.
Sukad nasunugan, usa na ka tuig ang mga biktima nga anaa lang gihapon nagpuyo sa barong-barong.
Si Konsehal Eugenio Gabuya nisugyot sa pagtukod sa duha ka andana nga building.
Apan si Konsehal Alvin Dizon gusto nga ang DWUP mokonsulta sa mga opisyal sa San Roque ug sa apektado’ng mga residente bahin sa plano sama sa re-blocking.
Gikwestiyon ni Konsehal Sisiño Andales ang DWUP kung ngano’ng limitado sa 64 ka pamilya ang makabalik sa luna human sa re-blocking.
Matud sa representante sa DWUP, Robert Barquilla, nga human sa re-blocking, ang ubang nangangkon og luna dili mga residente.
Matud ni barangay konsehal Leonarda Pepito nga ang namatay nga kapitan nga si Liodore Miranda ang nagbuot kung kinsa ang makaangkon og balik og luna. – /GMR) (BANAT NEWS)
- Latest
