Nakapusil og tulo nasikop
CEBU, Philippines – Nasikop sa kapolisan ang suspek sa pagpangawat og motor ug nakuhaan og .38 caliber revolver ug lima ka gagmay’ng pakete sa shabu alas 8:45 kagahapon sa buntag sa Punta Engaño, dakbayan sa Lapu-Lapu.
Si PO1 Vince Figuracion sa Mactan Police Station 2 niila sa suspek nga si Jimmy Inot, 25, residente sa sitio Malingin sa mao’ng barangay.
Naalarma ang kapolisan sa giingong armado’ng tawo hinungdan nga girespondehan nila’ng Police Chief Inspector Conrado Manatad ug nasikop si Inot.
Narekober usab sa kapolisan ang usa ka motorsiklo nga gikataho’ng kinawat sa suspek sa sitio Sea Breeze, Mactan sa niagi’ng kaadlawon.
Matud ni Figuracion nga ang tag-iya sa motor niadto sa Mactan Police Station 2 kagahapon sa buntag ug niila nga iya ang mao’ng motorsiklo.
Si Inot ang gitumbok usab nga suspek sa pagpamusil nila’ng Cesario Augusto, 54, ug Arnel Casinillo, 19, pulos taga barangay Mactan sa niagi’ng Hunyo 30 samtang si Lucris Malingin, 38, ang napusilan sab sa niagi’ng Hulyo 4.
Gibalhug sa Mactan Police Station 2 holding cell si Inot ug pasakaan sa tukma’ng kaso. – /GMR) (BANAT NEWS)
- Latest
