Obispo Villarojo gi-ordinahan na

CEBU, Philippines – Mokabat sa 50 ka obispo gikan sa nagkadaiya’ng Archdioceses ug Dioceses kuyog ang gatusan ka kaparian ang nitambong sa ordinasyon ni Rev. Msgr. Dennis Villarojo isip Auxiliary Bishop sa Cebu Metropolitan Cathedral kagahapon sa buntag.

Gawas sa kaparian nitambong usab ang nagkadaiya’ng kongregasyon sa mga madre ug mga layko nga gipangulohan nila ni Bise Gobernador Agnes Magpale, Mayor Michael Rama ug ang pamilya ni Villarojo.

Ang Santos nga Misa gidumala nila’ng Archbishop Jose Palma isip ordaining prelate kauban nila ni Archbishop Emeritus Ricardo Cardinal Vidal ug Most Reverend Giuseppe Pinto, ang Apostolic Nuncio of the Philippines, isip co- consecrators.

Matud ni Vidal sa iya’ng wali nga daku kaayo ang iya’ng kalipay nga niabot ang iya’ng damgo nga mahimo’ng obispo ang iya’ng personal secretary nga iya’ng gihulagway nga maayo’ng tawo ug masaligan sa tanan panahon.

Sulod sa Santos nga Misa, emosyonal ang inahan ni Villarojo nga si Bernadita tungod kay wala sila magdahum sa usa ka daku’ng gasa nga ila’ng nadawat atol sa ordinasyon sa iya’ng anak isip usa na ka Obispo.

"Kung naa pa ako’ng bana daku usab unta kaayo karon iya’ng kalipay nga makakita sa amo’ng anak," matud niya.

Si Palma sa iya’ng bahin nibutyag nga magpabilin si Villarojo nga team moderator sa Our Lady of Sacred Heart Parish sa Capitol ilabi na nga nagsingabot ang International Eucharistic Congress.

"In one little way sa ako’ng pagka-obispo ug pari, kung makahatag og presensya sa Ginoo daku nani’ng grasya ug gasa sa katawhan, Dios ang makahatag og kahupayan sa katawhan," pamahayag ni Villarojo.

Niadto’ng Hulyo 3 gipagawas ang appointment letter ni Pope Francis nga nagproklamar kang Villarojo nga Auxillary Bishop sa Sugbo kauban si Bishop Oscar Florencio.

Si Florencio pormal usab nga dawaton sa Sugbo karong Septiyembre 7. – /GMR) (BANAT NEWS)