Polis nga ‘nisuyop’ tangtangon

CEBU, Philippines – Polis nga nadakpan sulod sa drug den sa lungsod sa Dumanjug gustong ipatangtang sa serbisyo ni Chief Supt. Prudencio “Tom” Bañas , director sa Police Regional Office-7.

Matud pa ni Bañas nga walay luna sa ilang organisasyon ang mga badlungong polis kay inay maoy modakop sa mga nagpayuhot og drugas miapil na man hinuon sa pagsuyop ug nadakpan pa sa iyang mga kauban.

Sumala pa ni Bañas nga bati paminawon nga ang uban nga mga polis ang andam pakamatyan ang ilang panerbisyo apan dunay uban nga maoy nagbuling-buling niini.

Gusto ni Bañas nga kung matapos na ang imbestigasyon batok ni PO1 Ronald Sacan,  iya kining hukasan sa pagkapolis. Nasayran nga nagpositibo sa paggamit og ilegal nga drugas si Sacan human sa gihimong drug test.

“Nakakahiya sa kasamahan niya, nakakahiya sa mga kapulisan na who gave their lives fighting against criminal syndicates, tapos ikaw pala ay kasama sa mga tarantado,” matud pa ni Bañas.

Si PO1 Sacan nga sakop sa alert team sa Dumanjug Police kauban ang laing upat ka mga tawo ang nasikop  sulod sa drug den sa Brgy. Bitoon dihang gironda sa iya mismong team ang lugar.

Matud pa on duty niadtong higayona si Sacan apan miikyas kini ug miadto sa suyopanan, apan gidemalas kini kay mao diay kadtoy rumbo sa ilang alert team nianang gabhiuna. – /EIM) (BANAT NEWS)