Pugante sa Baguio prison nadakpan dinhi

CEBU, Philippines – Human sa pipila ka bulan nga pagtago-tago sa balaod gikan mieskapo sa prisohan didto sa kaulohan, nadakpan sa mga sakop sa Pinamungajan Police Station ang usa ka 35- anyos nga lalaki nga miuli sa ilang balay kay gimingaw sa iyang inahan diha sa Brgy. Lamac, pasado alas 8 sa nakalabay nga gabii.

Ang nadakpan mao si Felix Ponting, nagpuyo sa maong lugar ug nag-atubang og kasong murder.

Matud pa ni Police Officer 3 Darwin Melodia sa Pinamungajan Police nga nahinabi sa Banat News napriso sa Camp Gregorio del Pilar sa dakbayan sa Baguio niadtong Pebrero 6, ning kasamtangan nga tuig ang suspek.

Ang suspetsado ang gikatahong nagtrabaho sa kaulohan ug didto kini nalambigit sa usa ka krimen hangtud nga kini nakaeskapo sa maong prisohan.

Ang kapulisan sa Baguio nakakuha og impormasyon nga miuli sa ilang balay sa maong lungsod ang suspetsado hinungdan nga gialerto nila ang lokal nga kapulisan sa maong dapit. Kauban ang usa ka concerned citizen nadumduman ug nasikop sa mga operatiba ang suspek didto sa ilang balay.

Si Ponting nga nahinabi ni Melodia kini miingon nga gidawat sa suspek nga nadakpan siya pagbalik tungod kay nakita na man niya pag-usab iyang inahan nga iyang gikamingawan didto sa prisohan.

Gikatakdang ibalik sa kaulohan ang suspetsado aron mapaatubang sa iyang kaso. – /EIM) (BANAT NEWS)