Armado nangilog armas napusilan
CEBU, Philippines – Armadong lalaki nga gialarma napusilan sa armas sa polis nga iyaha usab untang ilugon sa dihang kini nadisarmahan diha sa Zone Agbati, Barangay Paknaan, Dakbayan sa Mandaue.
Si Judy Sitiota taga Barangay Pusok,Lapu-Lapu city ang nakabaton og samad pinusilan sa iyang tiyan dihang nakiglayog kini kang Police Officer 3 Roldan Balingbing nga sakop sa Investigation and Detection Management Branch (IDMB) sa Mandaue City Police Office.
Sumala pa ni SPO2 Marcos Noval Jr., imbestigador sa IDMB , si Balimbing mitubag sa alarma human ang ilang hepe sa IDMB nga si Chief P C/ Insp. Michael Anthony Bastes nakadawat og tawag sa telepono labot sa nasigpatan nga armadong lalaki sa maong dapit.
Matud pa ni Noval unang nakaabot sa lugar si Balingbing ug naabtan niya ang suspek nga nagkupot og kalibre .38 nga armas maong iyaha kining sekretong giduol dungan sa pagkupot sa kamot sa suspek.
Dihang nagpaila kining polis mikisikisi ang suspetsado hangtod nga nahitabo ang ilang linayugay ug panag-ilog sa armas hangtud nga nabuhian kini sa suspek ug nalagpot sa yuta.
Sumala pa nga buot untang ilogon sa suspek ang armas ni Balingbing nga kalibre .9mm apan aksidente kining mibuto tumong sa iyang tiyan.
Ang mga kauban ni Balingbing nga nauwahi og abot mitabang dayon sa pagkontrolar sa suspek ug kini giposasan ug gidala sa Vicente Sotto Memorial Medical Center sa dakbayan sa Sugbo.
Nakuha usab sud sa backpack sa suspetsado ang usa ka medium size ug duha ka gagmay nga paketeng may sud nga gidudahang shabu. – /EIM) (BANAT NEWS)
- Latest
