Patong-patong nga kaso

CEBU, Philippines – Nagpatong-patong nga kaso ang ipasaka sa kapolisan batok sa drayber sa wing van trak nga niharos sa napulo ka mga sakyanan ug motorsiklo nga niresulta sa kamatayon sa usa ka pastor diha sa dakbayan sa Mandaue.

Kasong reckless imprudence resulting with homicide, multiple physical injuries and multiple damage to property ang giandam sa traffic division sa Mandaue City Police Office (MCPO) batok kang Nelson Isobel  Atabelo.

Si Atabelo maoy drayber sa wing van type nga sakyanan nga nagkarga og sinakong asukar nga itumod unta sa dakbayan sa Sugbo apan nawad-an kini sa iyang brakes paghidangat sa eskina Canduman ug Basak niadtong Sabado sa buntag.

Ang maong dalan dulhogon ug dihang nawagtangan og brakes sa trak giharos niini ang upat ka motorsiklo lakip ang biktimang si Manolit Sobang nga taga Lamac, Consolacion.

Gawas sa upat ka motor, giharos usab niini ang unom pa ka mga sakyanan nga naglakip sa duha ka taxi, usa ka dump truck,  pribadong sakyanan nga napasok sa ilawom sa tiilan sa skywalk ug usa ka PUJ nga puno sa pasahero.

Si Police Officer 2 Nelson Sadili miingon nga nakasinati lamang og mga bun-og ang mga pasahero sa taxi bisan pa man kun napiyapi kini nga naduot sa dump truck nga gisundan niini. – /EIM) (BANAT NEWS)