Duha nalatayan patay

CEBU, Philippines – Duha ka mga backriders sa managlahing motorsiklo ang nangamatay human sila parehong nangatagak sa gisakyang motor ug nalatayan sa nagsunod kanilang mga sakyanan niadtong nakalabay nga adlaw.

Sa dakbayan sa Naga, nalatayan sa usa ka dump truck ang 18 anyos nga si Anthony Purisima, taga Poblacion, Sibonga.

Matud pa sa mga polis natumba ang iyang gisakyang motorsiklo samtang nagsubay sa dalan sa Brgy. Langtad  pasado alas 2 niadtong nakalabay nga hapon.

Ang drayber sa motorsiklo mao ra sab ang iyang ig-agaw nga 14-anyos kinsa swerteng wala ra maunsa.

Samtang ang drayber sa dump truck mao si Homelito Omayao, 41, nga taga Bunga dakbayan sa Toledo.

Matud pa ni Police Officer 1 Melther Kyamko sa Naga City Police nga nahinabi sa Banat News  nga nagsunod ang motor sa trak ug mi-overtake apan dunay sakyanang kalit nigawas sa crossing hinungdan nga naratol ang batang drayber  ug natumba sa kalsada.

Ang biktima   nalagpot gikan sa motorsiklo ug adto napasok ilawom sa dump truck ug nalatayan kini sa ligid hinungdan sa iyang kamatayon.

Samtang sa dakbayan sa Sugbo, patay na nga nadangat sa tambalanan ang usa ka 26 anyos nga babaye nga si Daisy Chua, human kini natagak sa motorsiklo  nga gimaneho sa iyang uyab nga si Hurdryne Conde, 24.

Matud pa nalatayan sa nagsunod nga jeep pasaheroan padung Apas ang biktima human natagak sa motor dihang nasaghiran sila sa laing sakyanan diha sa Escario Street sa nakalabay nga gabii.

Ang drayber sa nakasaghid sa mga biktima mao si Ernesto Pepito, 49, nagmaneho sa Suzuki multicab, nga taga Talamban, samtang ang drayber sa jeepney nga nakaligis sa dalaga mao si Oliver Nieves, 29, taga Pardo.

Sa imbestigasyon sa Traffic Patrol Group nga gipangulohan ni SPO1 Ramil Yncierto, nagsunod ang tulo paingon sa Gorordo Avenue.

Apan pag-abot sa maong lugar sulay untang mi-overtake ang multicab sa PUJ apan nasaghiran niini ang motorsiklo sa managhigugma hinungdan nga natumba sila sa kalsada hinungdan sa kamatayon sa dalaga. – /EIM) (BANAT NEWS)