Runner namatay
CEBU, Philippines – Usa ka Canadian national nga niapil sa usa ka 12-kilometer run sa R399 Run ang wala makatiwas sa lumba human kini kalit nga nawad-an og panimuot ug patay na sa pag-abot sa tambalanan.
Usa ka technical official sa maong event nga nakahinabi sa The Freeman/ Banat News nga di gustong magpahingalan miila sa namatay nga si Dean Borg.
Si Borg, 52, miapil sa men's 12-kilometer division sa R399 Run, usa kini ka event nga pahinungod sa namatay usab nga atleta nga misalmot kaniadto sa international event nga triathlon pipila ka tuig na ang nilabay.
"He was by his lonesome. And he even asked the line judges and marshals to take picture of him at the finish line," sumala pa sa tinubdan.
Ang lumba gisugdan alas 5:05 sa buntag diin baga kaayo ang panganod sa kalangitan. Matud pa nga kalma lang kaayo ang mga runners diin nakigdungan si Borg apan pag-abot sa gilay-on nga duha ka kilometro (unang likoanan) gikan sa starting line kalit nga dunay nahitabong komosyon.
Sumala pa sa iyang kapikas nga si Mary Jean, nga taga Brgy. Guadalupe, Cebu City, daling miresponde ang mga sakop sa ERUF ug mitabang usab ang usa ka medical doctor nga usa sa mga partisipante aron ma-revive si Borg.
Daling gidala si Borg sa Perpetual Succour Hospital apan gideklarar kini nga dead on arrival.
Sa wala pa magsugod ang lumba, mi-post si Tinago barangay captain Joel Garganera sa Faceboook niini nga si Borg natumba sa iyang bisekleta ug naigo ang ulo niini sa gutter duol sa starting line, apan niapil gihapon kini sa lumba. Wa pa matino kun unsa g’yuy hinungdan sa kamatayon sa maong langyaw.
Sumala pa nga si Borg mao ang presidente sa Clifton+Sage Consulting, usa ka business process outsourcing (BPO) nga bag-ohay lang nibalhin dinhi sa Sugbo gikan sa Manila.
Gawas sa R399, nakit-an na sa running community si Borg sa uban pang mga lumba sa dagan sama sa Cebu City 360* 72-kilometer ultramarathon ug nakahuman sa lumba sa ika- 89 gikan sa 174 official finishers sud sa dose ka oras, 45 minutos ug 58 segundos nga pagpakita lang nga anad siya sa long distance nga lumba.
Apan sama sa nahitabo kang anhing Ramie Igana, kinsa maoy gipahinungdan sa R399, namatay si Borg nga walay nakitang ilhanan nga kini dunay sakit nianang adlaw sa lumba.
Karong tuiga usab laing atleta ang namatay atol sa open water challenge, nga si Airman Eduardo Oriondo atol sa kompetisyon. Sumala pa sa mga higala niini, baskog ang lawas ug nangandam sa duha ka dagkong triathlon events si Oriondo. (Caecent No-ot Magsumbol sa The Freeman/EIM)
- Latest
