Nitulis sa iyaan nadakpan

CEBU, Philippines - Nasikop sa kapolisan ang usa ka lalaki nga nanulis, nang-snatch, ug misulay og tigbas sa iyang iyaan sa miaging buntag diha sa Sitio Lumboy, Liburon sa dakbayan sa Carcar.

Ang dinakpan giilang si Web Saducas, 22, samtang ang iyang gibiktima mao ang iyang iyaan nga si Rosalie Saducas, 39.

Si Police Officer 3 Melson Mendaros, desk officer sa Carcar Police Station miingon nga midangop sa ilang buhatan si Rosalie ug mipasangil nga gitulis siya sa pag-umangkon.

Matud pa ni Mendaros nga mipasangil ang iyaan niini nga giduol siya sa iyang pag-umangkon ug gipangayoan og kwarta, apan dihang iyang gibalibaran nasuko ang suspek ug mikuha kini og sundang. Nakuyawan ang  iyaan hinungdan nga gihatag niini ang iyang P400 ngadto sa suspek, apan wa gihapon matagbaw ang suspek, gilabni niini ang silver nga kwintas sa biktima ug pagkahuman gihapsan kini og sundang apan maayo na lang nga nakadagan. Ang suspek naabtan pa sa mga polis nga nagdala sa sundang ug mikaratil kini og dagan sa Liburon Elementary School ug didto na kini nadakpan.

Mga kasong robbery with violence or intimidation against person ug attempted homicide ang ipasaka batok sa suspek ugmang adlawa. (BANAT NEWS)