Nibayad og pekeng kwarta
CEBU, Philippines - Nagtingkagol karon sa prisohan ang usa ka lalaking padung na mosibat luwan sa usa ka bus pasaheroan human kini nikaon sa usa ka kan-anan sa Poblacion, Alegria apan peke ang kwartang iyang gibayad.
Ang gidakop mao si Loreto Sebastian, 44, kanhi taxi driver, nga nakuhaan og kapin P8 mil nga gidudahang mini nga kwarta.
Ang tag-iya sa kan-anan nga si Leonilo Librando, 58, nakabantay nga peke ang P500 nga gibayad sa suspek maong dali kining nangayo’g tabang sa kapolisan.
May mga saksi nga mitug-an sa mga polis nga nakasakay na og pampasaherong bus ang suspek hinungdan nga ilang gigukod ang bus kuyog ang biktima hangtud nga ilang naabtan.
Positibong gitudlo sa biktima ang suspek nga maoy mibayad kaniya og mini nga P500 hinungdan nga kini gidakop.
Sa pagrekisa kaniya, nakuha ang mga pekeng tag P1,000 ug P500.
Nakuhaan ‘sab siya og P1,570 nga salapi nga gidudahan sa mga polis nga iyang nakuha pinaagi sa pagpangilad.
Pasakaan og kasong kalapasan sa Article 168 sa Revised Penal Code ang suspek tungod sa paghupot niini ug pagbayad og mini nga kwarta. (BANAT NEWS)
- Latest
