Biyuda sa SAF 44 ‘giilad’

CEBU, Philippines - Nasagmuyo ang biyuda ni PO2 Romeo Cempron, 33, human wala nahinayon ang paghatag sa award sa iya’ng bana niadto’ng Biyernes atol sa ika-114 nga anibersaryo sa Philippine National Police.

Si Dr. Christine Cempron, nga nahinabi sa Banat News, nipabuhagay sa iya’ng kadismaya.

Matud niya nga sa niagi’ng semana may tawag siya nga nadawat gikan sa SAF Brigade nga nagpahibawo nga hatagan og Medal of Valor ang iya’ng bana.

Ang mao’ng medalya ang labing taas nga pasidungog nga ihatag sa PNP ngadto sa usa ka polis nga nagsakripisyo sa iya’ng kaugalingon.

Matud ni Dr. Cempron nga gihatagan siya og instruction nga papaliton og Filipiniana kay pormal ang awarding ug ang Presidente ang mohatag sa award.

Apan sa kaulahian wala nalakip ang ngalan ni PO2 Cempron sa mga listahan sa gihatagan og pasidungog kay matud pa nga taas pa ang proseso nga agian una mahatag ang award.

Si Cempron mao ang nisawo sa mga bala ug nanalipod ni PO2 Christopher Lalan sa 55th Special Action Company aron makadagan hinungdan nga siya lang ang nagpabiling buhi sa grupo sa engkwentro sa Mamasapano.

Matud ni Dr. Cempron nga makasabot man unta siya nga taas ang proseso apan ang dili niya masabtan ngano’ng may nipahibawo apan bakwion ra.

“Mura bitaw og gitagaan og regalo ug gibawian at the same time, morag napalaw ba,” matud ni Dr. Cempron.

Bisan wala nadayun ang paghatag og pasidungog,ang biyuda nilarga lang gihapon sa kaulohan aron sa paghandum sa iya’ng bana kagahapon sa buntag diin didto sa headquarters sa Special Action Force nagpahigayun og memorial alang sa mga nakalas nga sakop sa SAF. Naglaum gihapon si Dr. Cempron nga matagaan ra og pasidungog ang iya’ng bana.  (BANAT NEWS)