Instalasyon ni Bishop Villarojo ugma
CEBU, Philippines - Pormal nga i-instalar sa Apostolic Nunciature to the Philippines nga si Archbishop Giuseppe Pinto si Msgr. Dennis Villarojo isip bag-ong Auxiliary Bishop sa Archdiocese of Cebu alas 9 ugma sa buntag sa Cebu Metropolitan Cathedral.
Si Villarojo kinsa secretary-general sa International Eucharistic Congress 2016 nipahibawo nga 18 ka obispo sa nasud, 300 ka kaparian sa Archdiocese of Cebu, mga sakop sa iya’ng pamilya, higala, mga volunteers sa IEC ang motambong usab sa installation. Isip iya’ng spiritual preparation, si Villarojo nipaubos sa usa ka retreat sa niagi’ng semana isip pagpangandam sa umaabot niya nga obligasyon.
Mapasalamaton si Villarojo sa grasya bisan sa iya’ng mga kahingawa ug kabalaka sa daku kaayo nga responsibilidad sa umaabot nga adlaw.
“Pasalamat ta sa Ginoo tungod ang pagka-obispo alang sa pag-alagad sa katawhan ug sa pagpalambo sa pagtuo. Daku’ng gasa usab kini sa International Eucharistic Congress 2016," matud niya.
Si Villarojo gitudlo ni Pope Francis isip bag-ong Auxiliary Bishop niadto’ng Hulyo 3 atol sa Angelus message subay sa kapistahan ni St. Thomas the Apostle.
Siya ang kasamtangan nga team moderator sa Our Lady of the Sacred Heart Parish sa Capitol Site.
Si Archbishop Jose Palma sa iya’ng bahin malipayon usab sa pagbaton og bag-ong duha ka obispo sa Archdiocese of Cebu tungod kay makatabang sila sa daghang gimbuhaton nga naglangkub sa pagpalambo sa pagtuo ug pagpakusog sa serbisyo sa Archdiocese. (BANAT NEWS)
- Latest
