Drayber posibleng naalaan ra

CEBU, Philippines - Kapuyo sa taxi driver nga nag-sideline pagmaneho og pribadong sakyanan nga naapil sa namatay sa ambush sa dakbayan sa Talisay nagdudang napagan lang iyang bana sa iyang agalon.

Matud pa ni Helen Abapo sa Banat News posibleng naalaan sa mga mamumuno ang iyang kapuyo nga si Fritz Cobong nga mao ang bana sa survivor nga si Ma. Luisa  Lapinid.

Ang bana ni Lapinid matud pa usa ka retiradong polis ug karon nahimo nang negosyante. Nangayo karon og hustisya si Helen tungod sa kamatayon ni Cobong.

Motabang sa imbestigasyon sa ambush sa dakbayan sa Talisay ang Provincial Intelligence Branch (PIB) ug Provincial Investigation Detection and Management Branch (PIDMB) sa Cebu Provincial Police Office. Si Senior Superintendent Noel Gillamac, direktor sa CPPO  mibutyag nga gusto niyang madali ang imbestigasyon sa maong kaso aron masulbad kini sa labing daling panahon.

Sumala pa niya, duna na silay gisundang mga posibleng mao ang mga suspek apan dili pa nila ikabutyag ilang mga pagkatawo.

“Profiling of the victim and profiling of the suspects because when you profile the victim we will know kinsa mga posible nga mga kontra unsay mga interest sa mga tawo nganong gibanhigan sila,” matud pa ni Gillamac.

Atol sa maong hitabo bugtong naluwas sa pagpamanhig si Ma Luisa Lapinid, apan patay ang asawa sa iyang igsuon (bilas) nga si Lorna Lapinid ug ang ilang drayber nga si Fritz Cobong.

Igo sa dughan ang mga namatyan sa duha ka mga biktima human kini girapido ang ilang gisakyan nga kotse gamit ang KG9 submachine pistol sa gunman nga nakaangkas sa usa ka motorsiklo diha sa Lawaan dakbayan sa Talisay niadtong Huwebes sa buntag. (Jojo C. Ugdol ug Rowena Capistrano/EIM)(BANAT NEWS)