Pamatay lamok gipanghatag sa mga tunghaan

CEBU, Philippines - Dili mominus sa 2,300 ka pangpubliko’ng tunghaan sa Central Visayas ang makadawat og larvicide, usa ka kemikal nga mopatay sa itlog sa lamok.  Kini gipaagi sa 19 ka school divisions sa rehiyon tumong sa pagsumpo sa pagsaka sa kaso sa dengue.

Matud ni Dr. Wybin Briones, pangulo sa Dengue Free-Movement sa Rotary International District 3860, nga ang larvicide ibutang sa nagpundo nga tubig ug kadto’ng mga puy-anan sa lamok sama sa lata, ligid, flower pots ug uban pa’ng containers.         Iya’ng gitataw nga ang kemikal epektibo ug luwas sa kalikupan ug sa panglawas.

Ang kampanya gisugdan niadto’ng tuig 2010 sa pagpakig-alayon sa mga civic group organizations sama sa Rotary Clubs in Cebu ug ahensiya sa gobiyerno.

Base sa natala sa Department of Health-7, 16 ka tawo ang namatay sa dengue gikan sa 2,843 ka kaso karong tuiga.

Matud sa buhatan sa Regional Epidemiology and Surveillance Unit sa DOH-7, ang kaso nisaka og 2.4 porsiyento itandi sa 2,777 ka kaso ug 11 ang patay sa niagi’ng tuig. Kasagarang biktima nagpangedaron og 21-anyos pataas gikan sa siyudad sa Sugbo, Lapu-Lapu, Toledo, Dumaguete ug sa lungsod sa Liloan. (Kristine B. Quintas/GMR)(BANAT NEWS)