Batan-on niluwas sa tiguwang

CEBU, Philippines - Giagak sa 20-anyos nga lalaki ang 70-anyos nga babaye nga dili kalakaw atol sa pag-ulbo sa sunog sa barangay Sambag 1, dakbayan sa Sugbo.

Si Sanny “Boy” Nacorda, lumad nga taga sitio Kabulihan sa mao’ng barangay, usa sa biktima sa sunog niadto’ng Domingo sa gabii.

Matud ni Nacorda nga naglakaw siya dapit sa balay sa tiguwang aron pangitaon ang iya’ng iyaan ug manghud diha’ng nakita niya ang tiguwang nga naglingkod sa kilid sa gate.

Dugang ni Nacorda nga mapasalamaton siya niadto’ng higayuna nga wala siyay gi-alsa ug iya gyud gitabangan ang tiguwang tungod kay naluoy siya.

Pulos mga babaye ang anak sa tiguwang hinungdan nga wala kini matabangi dayun.

Gidala ni Nacorda ang tiguwang sa basketball court aron maluwas gikan sa kainit sa kayo nga nagdilaab.

Si Nacorda tinun-an sa Information Technology sa University of the Visayas ug kinamaguwangan sa tulo ka managsuon.

Asoy ni Nacorda nga miyembro siya sa usa ka relihiyoso’ng grupo sa mga batan-on sa Santo Rosario Parish Church ug nagserbisyo siya sa simbahan sulod sa upat na ka tuig.

Ang iya’ng inahan usa ka P.O. Card dealer sa usa ka mall sa dakbayan sa Sugbo nga mao’y nanginabuhi para sa ilaha. (BANAT NEWS)