Kaso sa rabies sa Sugbo nikunhod

CEBU, Philippines - Nikunhod ang kaso sa rabies sa probinsiya sa Sugbo tungod sa hugtano’ng kampaniya sa mga lokal nga kagamhanan.

Wala nalakip sa talaan ang dakbayan sa Sugbo ug Lapu-Lapu isip mga highly-urbanized city.

Base sa talaan sa Provincial Veterinary Office (PVO) nga niadto’ng tuig 2008 nikabat sa 42 ka kaso sa rabies sa iro ug nahimo na lang kini’ng lima sa niagi’ng tuig diin duha sa Balamban, duha sa dakbayan sa Talisay ug usa sa San Remigio.

Karon tuiga duha ka kaso ang natala sa dakbayan sa Talisay.

May natala nga pito ka tawo ang namatay sa rabies sa tuig 2008 apan nikunhod ug nahimo na lang tulo sa tuig 2014 ug usa karong tuiga.

Subay niini, si Mary Rose Vincoy, hepe sa PVO, nagkanayun nga mokabat sa 300,000 ang populasyon sa iro sa tibuok probinsiya lakip na ang mga highly-urbanized city sa tuig 2014.

Tumong nila nga ang tibuok probinsiya madeklarar nga “rabies-free zone” sa National Rabies Prevention and Control Program Committee.

Usa sa rekisitos mao nga ang lugar kinahanglan nga sa nilabay’ng duha ka tuig wala’y bisan usa ka kaso sa rabies sa tawo ug iro.

Laing rekisitos nga kinahanglang 70 porsiyento sa kinatibuk-ang populasyon sa mga iro sa lugar ang nabakunahan og anti-rabies vaccine.

Niadto’ng tuig 2011, ang isla sa Camotes ug Malapascua gideklarar nga rabies-free zone ug karong tuiga ang girekomendar sa PVO mao ang isla sa Bantayan ug Zaragosa sa lungsod sa Badian. (BANAT NEWS)