PDRRMO alerto tungod ni “Hannah”

CEBU, Philippines – Gipaalerto sa Provincial Disaster Risk Reduction and Management Office (PDRRMO) ang mga Local Disaster Risk Reduction  Management Office (LDRRMO) sa kalungsuran bisan og dili mo-landfall ang bagyong Hannah.

Si Julius Regner, tigpamaba sa PDRRMO nagkanayon kinahanglang di mokompiyansa ug monitoron g’yud  ang bagyo tungod kay base sa report sa Pagasa, nagdala og kusog nga uwan ug hanging habagat ang Hannah.

Tungod niini, iyang giawhag ang LGUs nga bantayan gyud ang mga landslide prone areas ug ipalayo ug magmabinantayon ang mga residente gikan sa mga peligro nga lugar.

Si Al Quiblat, weather forecaster sa Pagasa -Mactan nagkanayon nga ang bagyong Hannah nga dunay international name nga Soudelor gilaumang mamahimong super typhoon sa mosunod nga 24- oras. Gibana-banang mosulod kini sa Philippine Area of Responsibility (PAR) karong buntag (Miyerkules) sa 1,400 km sa sidlaka’ng bahin sa Calayan Island sa Luzon.

Gilauman nga maapektahan niini ang Visayas ug Mindanao sa Huwebes ug Biyernes.

Gihulagway kini nga labing kusog nga bagyo niining tuiga nga nisulod sa PAR apan di kini motugpa sa kayutaan, ug birahon niini pataas ang hanging habagat.

Giklaro sa Pagasa nga dili ang maong bagyo maoy hinungdan nga nasinati karong mga pag-uwan sa kahapunon ug kagabhion gumikan kay epekto kini sa Intertropical Convergence Zone (ITCZ).

Karong adlawa gipaabot nga dagko ang bawod ilabi na sa kaadlawon  ug gibanabanang mosaka ang dagat ngadto na sa 1.4 meters.

Sa weather advisory no. 2 sa PAGASA nga giisyu kagahapon sa alas 11:00 sa buntag, mga alas 10:00 sa buntag, ang mata sa bagyo nahimutang sa 1,855 kilometers (km) sa sidlakang Luzon nga may gikusgong hangin nga 215 kilometer per hour (kph) duol sa sentro ug moabot ngadto sa 250 kph ang gikusgon sa unos.

Nag-irog kini sa kasadpang amihana’ng kasadpan sa gipaspason nga 20 kph.

Sa Huwebes sa buntag gibana-bana kini’ng mahimutang sa 850 km sa sidlaka’ng bahin sa Itbayat, Batanes ug sa Biyernes sa buntag 400 km sa sidlakan amihana’ng sidlakan sa Itbayat, Batanes ug 520 km sa amihana’ng bahin sa Itbayat.

Sa Sabado sa buntag ang bagyo gilauman nga mogawas na kini sa PAR. – /EIM) (BANAT NEWS)