Ni-ambush sa polis dakpon g’yud––Bañas
CEBU, Philippines – Direktor sa Police Regional Office -7 mimando og manhunt operation batok sa duha ka mga lalaking ni-ambush sa usa ka polis diha tungod sa ilang panimalay niadtong Domingo diha sa Nivel Hills, Brgy. Busay, Cebu City.
Si Chief Supt. Prudencio “Tom” Bañas miingon nga tulo ka anggulo ang ilang gitan-aw sa maong hitabo nga naglakip sa trabaho, negosyo ug personal nga kasuko ngadto sa biktimang si PO3 Ramon Bolongaita, sakop sa Regional Police Holding and Accounting Unit-7. “We will not allow them to go unpunished, somehow kukunin natin sila because we cannot afford to be afraid, let us always be on the offensive,” matud pa ni Bañas.
Subli ‘sab niyang gipahimangnoan ang mga sakop nga mag-amping sa ilang kaugalingong seguridad tungod kay dili kalikayang adunay maligsan sa ilang mga trabaho.
Si Bolongaita nadestino kaniadto sa Mandaue City Police Office una pa nabalhin sa RPHAU-7.
Ang hepe sa City Intelligence Branch (CIB) sa Cebu City Police Office, Superintendent Romeo Santander nga nahinabi sa Banat News mihulagway nga dili “professional killers” ang mi-ambush ni Bolongaita.
Kini base sa igo sa mga bala diha sa bintana sa sakyanan sa biktima nga katag kaayo ang igo. Nagtuo usab siyang nagpanagana ang gunman kay nagtuo nga armado si Bolongaita.
Si Bolongaita kauban sa iyang pamilya gikan nisimba ug swerteng nakanaog na iyang asawa ug mga anak dihang kalit kini gipaulanan og bala diha sa sud sa sakyanan nga padung pa niyang igarahe.
Naigo siya tulo ka higayon apan swerteng dili patyanan sumala pa ni SPO2 Rommel Bancog, imbestigador sa maong kaso. – /EIM) (BANAT NEWS)
- Latest
