Popularity rating ni Roxas mosaka— Tommy

CEBU, Philippines - Nagtuo si kanhi Kongresista Tomas R. Osmeña nga karong gituboy na ni Presidente Aquino si DILG Secretary Mar Roxas mosaka na ang iyang popularity rating.

Matud ni Osmeña nga hangyuon g’yud niya ang katawhan nga botohan si Roxas aron mapadayon ang kampanya ni PNoy nga mao ang pagsumpo sa pagpangawkaw.

Apan si Mayor Michael Rama miingon nga karon angay na nga si Roxas mo-resign sa pagka kalihim sa DILG aron dili siya katahapan nga gamiton ang iyang katungdanan sa pamolitika.

Samtang si Rama mitataw nga dili pa g’yud sigurado nga kadtong mga ngalan sa mokandidato nga iyang gibutyag nga kabahin sa line-up sa Team Rama mao na g’yud ang malakip sa final nga listahan.

Gitataw sa mayor nga daghan pa kaayo ang mahitabo ug mahimo lang nga final ang mga kandidato kun sila makapasaka na sa ilang certificates of candidacy didto sa Commission on Elections.

“Bisan gani og maka-file na sa ilang COC didto sa Comelec, aduna pa man gani usahay substitution ug ang uban mo-backout sa kandidatura,” pasabot sa mayor.

Gipahibalo usab ni Mayor Rama nga adunay mga ngalan sa mga tawo nga kanhi mga konsehal nga nagtinguha usab nga molansar pagbalik apan wala niya iapil sa pagpahibalo sa media.  (BANAT NEWS)