Roxas giendorsar na ni PNoy

CEBU, Philippines - Pormal nang giendorsar ni Presidente Benigno Aquino III kagahapon nga standard bearer sa Liberal Party si Interior Secretary Manuel Roxas II  alang sa 2016 presidential elections.

Gihimo kini ni Aquino sa makasaysayanong Club Filipino sa San Juan City sa gitawag nga "A Gathering of Friends" ug gitambongan sa nagkadaiyang political party leaders, mga representante sa nagkadaiyang civil society groups ug mga organisasyon ingon man mga national ug local government officials.

Si Aquino mipasalig nga adunay katakos si Roxas mamahimong pangulo sa nasud ug mopadayon sa "Daang Matuwid."

"Dun na po tayo sa siguradong itutuloy ang 'Daang Matuwid.' At ang paniwala ko po ang taong ito, walang iba kundi si Mar Roxas," matud pang Aquino sa report sa Philstar.Com.

Masaligon si Aquino nga way mga tawong gikautangan og kabubut-on si Roxas ug ang naa sa kasingkasing niini mao lang ang interes sa nasud ug di iyang kaugalingon.

Kahinumdoman nga si Roxas mao untay standard bearer kaniadtong 2010 elections sa LP apan nipaubos kini ug si Aquino maoy nikandidato. Si Aquino sa iyang kataposang State of the Nation Address (SONA) niadtong Lunes namahayag nga bahin kang Roxas nga: “You can not put a good man down.”

Si Roxas maoy nagpasiugda sa business process outsourcing industry sa Pilipinas hinungdan sa paglambo karon sa call centers ug dako og nahimong papel sa rehabilitasyon sa Bohol earthquake, Typhoon Yolanda ug sa Zamboanga niadtong tuig 2013. "In my experience, I know that, whatever orders are given to Mar, he will not leave until the situation is stable.

I know that everything is in good hands and that he does not need to wait for orders, just to ensure that all needs are met," matud pang Aquino, kinsa wa pa mohingalan sa iyang vice presidential candidate.

Gipanawagan sa pangulo ang mga Filipino nga suportahan si Roxas sa 2016 aron di na mobalik sa kaniadtong kurakot nga panggobiyerno ang nasud. (Edwin Ian Melecio)

Ironman 70.3 moarangkada na

Magsugod karong adlawa ang international sporting event nga 2015 Ironman Triathlon pinaagi sa Ironkids diha sa dakbayan sa Lapu-Lapu, ug sa Ironman ugmang adlawa ug tungod niini adunay mga kausaban nga gihimo sa kadalanan sa Metro Cebu.

Dinhi sa Cebu City, adunay mga dalan nga pasirad-an atol sa ipahigayon nga Ironman ugmang adlawa.

Si Joy Tumulak , assistant executive director sa City Traffic Office nga gikahinabi sa Banat News nagkanayon nga alas-5 pa sa kaadlawon hangtud sa alas-12 sa udto di paagian ang S. Osmeña Street ngadto na sa South Road Properties (SRP).

Anha sa mga dalan sa M.J Cuenco Avenue ug Escario Street ang alternatibong dalan padung sa Pier 1, 2, 3 ug labi na ngadto sa mopadulong sa airport. Sumala pa ni Tumulak mopakatap sila og 180 ka mga traffic personnel ug lakip na niini ang 30 ka mga sakop sa engineering nga maoy magmuntar sa railings.

Samtang si Barangay Captain Joel Garganera ang usa sa mga sakop sa Police Coordinating and Advisory Council nibutyag nga 268 ka mga polis, 200 ka mga barangay tanod, ug tres mil ka mga kadete ang motabang sa seguridad.

Gipasidan-an usab ni Konsehal Dave Tumulak ang publiko nga gustong motan-aw sa maong paugnat sa kusog nga posibleng adunay paguwan-uwan nga masinati. Gipahimangnoan niya ang mga organizers nga siguraduhong aduna silay nakaestambay nga medical team nga magmabinantayon.

Samtang sa dakbayan sa Mandaue, alas 4 sa kaadlawon ugmang adlawa sirad-an sa trapiko ang Mandaue- Mactan Bridge ug ingon man ang dalan Plaridel nga manukad sa eskina Pocherohan sa A.C. Cortes Avenue  lahos ngadto sa Ouano Avenue sa Reclamation Area alang sa Ironman.

Si Glenn Antigua nga maoy officer in-charge sa Traffic Enforcement Agency of Mandaue (TEAM) gihangyo na nila ang DPWH nga tabunan ang mga lungag-lungag sa dalan sa ilang mga proyekto aron di madisgrasya ang mga atleta.

Si Senior Superintendent Mariano Natuel nga maoy officer-in-charge sa Mandaue City Police Office (MCPO) miingon nga aduna silay daghang polis nga ipakatap sa rota.

Samtang 250 ka mga security personnel ang ipakatap sa habig sa siyudad sa Talisay atol sa maong kalihokan. Gawas pa niini, adunay mga ibutang nga emergency teams sa rota aron daling makaresponde kun gikinahanglan.

Ang Iron Man 70.3 magagikan sa siyudad sa Lapu- Lapu ngadto na sa SRP sa siyudad sa Talisay. (BANAT NEWS)