Red Cross sa Bogo gilungkab
CEBU, Philippines - Nahanaw ang mahalon nga mga butang sa buhatan sa Philippine Red Cross sa barangay Dakit, dakbayan sa Bogo human gilungkab sa niagi’ng gabii ug alas 8 na sa buntag kagahapon nadiskubrehan.
Si Police Officer 2 Alexander Ancao Jr., imbestigador sa Bogo City Police Station, niingon nga usa sa mga office staff nga si Airish Tampus ang nitaho sa insidente.
Gitug-an ni Tampus nga ang mga kawatan nakahigayun sa pagsulod sa stock room pinaagi sa pagguba sa window grill nga puthaw ug gisakiyo ang duha ka chain saw nga mokabat sa P20,000 ang matag usa.
Dugang ni Ancao nga ang chain saw mao’y dali nila’ng magamit sa paghawan sa kadalanan panahon sa bagyo diin mangatumba ang kahoy ug mobabag sa kadalanan.
Gitataw ni Ancao nga nagpadayun karon ang ila’ng pakisusi alang sa pag-ila sa mga kawatan nga nilungkab. (BANAT NEWS)
- Latest
