Pagbalhin sa CSBT daghang supak

CEBU, Philippines - Ang mga pasahero ug drayber sa Cebu South Bus Terminal (CSBT) supak nga balhinon ang maong terminal tungod kay gawas nga makahasol kanila modako usab ilang gasto sa pletihan aron makaabot nganhi sa dakbayan sa Sugbo.

Ang maong lakang giingong gisugyot ni Mayor Michael Rama nga adto kini ibalhin sa lungsod sa Minglanilla o sa dakbayan sa Talisay.

Apan si Christine Canoy, 19-anyos, taga lungsod sa San Fernando ug estudyante sa Asian College of Technology (ACT) nagkanayon nga matag adlaw siya mobiyahe sakay sa bus paingon sa iyang eskuylahan sa dakbayan sa Sugbo.

Matud niya nga kung manaog siya sa Minglanilla unya mosakay na usab og laing public utility vehicle (PUV) paingon sa dakbayan sa Sugbo modako iyang pletihan.

Samtang si Ellen Yap, 59-anyos nga taga Barangay Valladolid, dakbayan sa Carcar nagkanayon nga kun balhinon ang CSBT hasol kanila ang pagbalhin-balhin og laing sakyanan ilabi na kun sila adunay mga kargamento.

Si Flojel Hoyohoy, taga lungsod sa Santander, drayber sa Ceres bus ug ang controller sa Jade Transport dili usab uyon nga ibalhin ang CSBT sa gawas sa Cebu City tungod gihapon sa kahasol ug kadako unya sa gasto sa mga pasahero nga ibunga niini.  Ang tumong ni Rama pagbalhin sa CSBT sa gawas sa Sugbo mao ang pagpaluag sa dagan sa trapiko sa dakbayan sa Sugbo ilabi na diha sa nahimutangan sa CSBT.

Matud ni Rama nga mi-suggest na siya niini kaniadto kang Gobernador Hilario Davide III kay di siya buot nga adunay mga terminal sa dakbayan tungod sa kadaghan na sa mga tawo ug sa mga sakyanan sa siyudad kun itandi kaniadto.

Apan si Bise Gobernador Agnes Magpale miklaro nga wala pay miduol nga opisyal sa dakbayan sa Sugbo kabahin sa maong plano. Wa hinuon siyay pagsupak niini apan kinahanglan nga ang balhinang lugar di usab magkaproblema sa trapiko.

Si Ramon Dumayac, operations manager sa CSBT miklaro nga wala pa sila makadawat og pormal nga komunikasyon gikan sa dakbayan sa Sugbo bahin niini apan kun siya’y pangutan-on uyon siya niini kun sa SRP kini ibalhin.

Matud niya, kapin 20 ka tuig na ang nakalabay ug niadtong mga panahona gamay pa ang mga sakyanan ug mga tawo, apan karon naghuot na ang tawo ug sakyanan sa kadalanan sa dakbayan sa Sugbo.

Ang CSBT hugopan og  3 mil ngadto sa 5 mil  ka pasahero ug gatosan ka mga bus matag adlaw nga magdasok sa 11 mil metro kwadrado lamang nga terminal karon. (BANAT NEWS)