Duha ka lalaki nilayat ngadto sa kamatayon

CEBU, Philippines – Duha ka tawo ang namatay human parehong nilayat gikan sa usa ka pangpang ug sa usa ka taytayan sa managlahing dapit dinhi sa Sugbo.

Patay diha-diha dayon ang 34 anyos nga si Freddie Fabroa, human milayat sa 60 ka tiil nga pangpang sa Sitio Buwawan, Brgy. Southern Poblacion lungsod sa San Francisco. Sa imbestigasyon sa San Francisco Police Station nga gipangulohan ni Senior Police Officer 2 Jose Argallon ug mga kaubanan, ang pamilya ni Fabroa miangkong aduna kini nerbiyos ug magpunay na lang og yawyaw bisan walay kaestorya. Sumala pa nga niadtong nakalabay nga buntag  nilakaw kini  ug ila na lang napalgan sa ubos sa 60 ka tiil nga pangpang apan patay na.

Samtang napalgan kagahapon sa buntag ang patay’ng lawas sa usa ka Victor Madaiton,45, taga Univille, Kasambagan, dakbayan sa Sugbo  diha sa bukana sa Mahiga Creek sa Brgy. Subangdaku, sa dakbayan sa Mandaue.

Si Senior Police Officer 2 Remegio Arciaga sa Presinto 2 sa Mandaue City Police Office (MCPO) miingon , ang pag-umangkon sa namatay ug usa ka igsoon niini maoy miila sa patay’ng lawas nga nakaplagan sa molupyo nga si Ronnie Zuñega.

Nasayran nga alas- 3 sa hapon niadtong Lunes atol sa kusog nga pagbunok sa ulan nakadawat og  report ang kapolisan bahin sa lalaking kalit nga milayat sa sapa sa Banilad, Cebu City.

Matud ni Konsehal Dave Tumulak sa City Disaster Risk Reduction Management Council, gialarma kini sa command center nga milayat gikan sa atop sa ilang balay si Madaiton, ug pagkahuman milayat sa maong sapa. – /EIM) (BANAT NEWS)