Multicab nalimbuwad, upat naangol

CEBU, Philippines – Upat ka tawo ang talandugon karon sa tambalanan tungod sa pagkalimbuwad sa gisakyan nilang multicab gikan nangompra og manga samtang nagdagan sa Transcentral Highway, Brgy. Cansomoroy sa lungsod sa Balamban sa nakalabay nga hapon.

Ang mga biktima mao sila si Dante Corales, 40, drayber sa multicab, Mercedita Belda, 40, ka live-in partner sa drayber, Joram Castro, 30 ug Emma Capua, 61.

Matud pa ni Police Officer 1 Alexander Camoro ang desk officer sa Balamban Police nga nahinabi sa Banat News gikan sa bukirang bahin sa Balamban ang mga biktima kay nangompra og 400 ka kilo nga  manga.

Apan pag-abot sa dulhogon nga bahin sa maong lugar nawad-an og brake ang multicab ug nabangga sa kilid sa kalsada ug maayong pagkalukot sa sakyanan hinungdan sa mga bun-og sa kalawasan sa mga biktima.

Gidala sa Balamban District Hospital ang upat apan gibalhin sa tambalanan sa dakbayan sa Sugbo.

Gitambagan ni Camoro ang mga motorist nga di magpalabi sa gibug-aton sa ilang mga karga tungod kay nagduda kining mao kini ang hinungdan nganong wala makaagwanta ang brakes sa multicab. – /EIM) (BANAT NEWS)