P1.4B nakolekta sa kapitolyo

CEBU, Philippines – Nikabat na sa P1.4 bilyones ang nakolekta’ng buhis sa kagamhanan sa probinsiya sa Sugbo sukad Enero hangtud Hunyo

Si provincial treasurer Emmanuel Guial nibutyag sa top 5 nga gigikanan sa buhis nga nakolekta diin nag-una niini ang bayad gikan sa 16 ka district hospitals sa probinsiya nga nikabat sa P86.4 milyones.

Sunod ang real property tax (RPT) nga nikabat sa P48.2 milyones; koleksiyon sa Cebu South Bus Terminal (CSBT) nga nikabat sa P33 milyones; sand and gravel and other quarry resources nga nikabat sa P13.6 milyones; ug ikalima ang transfer tax nga nikabat sa P10.18 milyones.

Matud ni Guial nga nikabat sa 39.1 porsiyento ang saka sa koleksiyon sa buhis sa probinsiya.

Gibutyag ni Guial nga sa kinatibuk-an sa nilabay’ng tuig, ang ila’ng nakolekta nga buhis nikabat sa P2.438 bilyones.

Niining tuiga mokabat sa P2.859 bilyones ang target sa probinsiya nga makolekta’ng buhis lakip na ang pagpabaligya sa lote sa probinsiya nga nahimutang sa Maria Luisa Village sa Banilad, dakbayan sa Sugbo.

Matud ni Guial nga mokabat sa P144 milyones ang estimated value sa mao’ng lote nga adunay gilapdon tanan nga sobra sa usa ka ektarya.

Dugang ni Guial nga ang probinsiya adunay P291 milyones nga surplus o savings sa nilabay’ng tuig.

Subay niini, ang probinsiya nakadawat og citation sa highest growth rate on locally sourced collection sa Rehiyon-7; seal of good financial housekeeping sa 2014; nag-una sa collection sa fees ug charges sa upat ka probinsiya sa rehiyon, ikaduha sa RPT collection sa upat ka probinsiya sa rehiyon ug ikaduha sa business tax collection sa upat ka probinsiya sa rehiyon. niini’ng tuiga. – /GMR) (BANAT NEWS)