LP mayor sa bohol gidakop

CEBU, Philippines - Gidakop sa Criminal Investigation and Detection Group ang kanhi mayor sa lungsod sa Corella sa probinsya sa Bohol sa kaso’ng giatubang sa Sandiganbayan pasado alas 10 sa nakalabay nga buntag.

Ang akusado mao si kanhi mayor Vito Rapal, 55, minyo, sakop sa Liberal Party nga taga barangay Canangca-an sa mao’ng lungsod.

Si Rapal nag-atubang og kaso’ng graft ug malversation of public funds sa Fourth Division sa Sandiganbayan.

Sa pagpakighinabi sa mga tigbalita ni Rapal kini niingon nga posible’ng may bulok politika ang kaso.

Matud ni Rapal nga human siya napilde sa pagka-mayor sa nakalabay nga piniliay, aduna’y mga nangawala nga papeles ug dili na iya’ng tawo ang naglingkod sa munisipyo hangtud nga siya gipasakaan og kaso.

Sugod 2001 hangtud 2010 nahimo siya’ng mayor sa lungsod ug tuig 2010 hangtud 2013 nahimo siya’ng bise-mayor.

Tinguha ni Rapal nga makapiyansa ug nagplano sab kini nga mobalik pagdagan pagka-mayor sa umaabot nga eleksiyon. (Jojo C. Ugdol/GMR)(BANAT NEWS)