TCDH: Patay nang daan ang puya sa tiyan

CEBU, Philippines - Gipanghimakak sa Talisay City District Hospital nga gipasagdan nila ang ilang manganakay nga pasyente nga si Charito Topacio nga miresulta sa kamatayon sa iyang anak niadtong adlaw’ng Miyerkules, Hulyo 22.

Kahinumduman ang maong hitabo nag-viral sa social networking site nga Facebook human gi-upload ang mga hulagway sa bata nga dunay daghang lagom sa lawas.

Sigon ni Dr. Agustin Agos Jr., Chief of Hospital sa Talisay City District Hospital pag-abot sa inahan sa tambalanan gidala dayon kini sa delivery room, gisugat kini sa midwife ug duha ka obstetricians.

Matud niya, sa wala pa kini nanganak gisusi nila ang pinitik sa kasingkasing sa bata apan nasuta nga wala na kini nipitik ug ilang gipahibawo niini ang bana kinsa miingon nga luwason na lang ang iyang asawa.

“I disagree nga wala ma-inform ang family, I think they were informed three times. Pag-abot pa lang wala nay heartbeat ang baby, gi-appraise na sila nga wala nay heart tone,” matud ni Agos.

Tungod kay patay na ang bata ila dayong gidala sa delivery room table ang inahan aron ipagawas ang patay nang bata apan naglisod sila niini kay naglambod ang pusod niini sa ilawom.

Siya mipasabot nga maong milagom ang bata tungod kay patay na kini ug wala nay circulation sa sulod sa tiyan sa inahan.

Si Dr. Ethel Anne Lariego, chairman sa OB-GYN Department sa TCDH miingon kinahanglang putlon ang pusod tungod kay naglambod man kini nga maoy nakadala og huot ug hinungdan nga dili g’yud kagawas ang bata.

Ila usab nasayran nga lapas na sa adlaw ang pagmabdos sa inahan tungod kay 41 ka semana ug duha ka adlaw na kining overdue, ang normal nga pagmabdos 38 ngadto sa 40 ka semana lamang.

Sumala pa nila angay unta nga sa ospital na nagpundo ang ginang dihang niabot na kini og 38 ka semana aron na-monitor kun normal delivery ba o kinahanglang ipaagi sa cesarean section.

Apan bisan pa man niini, si Agos mohimo og imbestigasyon apil sa iyang pangutan-on ang pasyente kun asa kini nagpa pre-natal check up tungod kay ang ospital wala may records kaniya. Samtang ang pamilya sa bata nga namatay hustisya  ang gipangayo kay nagduda silang nagpasagad ang tambalanan.

Base sa medical result nga gipagawas sa Vicente Sotto Memorial Medical Center “Intrauterine Fetal Death Secondary to Fetal Asphyxia secondary to undelivered after coming death” ang hinungdan sa kamatayon sa bata.

Apan giangkon sa iyaan sa bata nga si Lita Topacio nga nakahinabi sa Banat News nga sa pagkakaron, ilaha unang unahon ang pag-atiman ug pagpalubong sa puya ug sa mga balayrunon sa tambalanan. Si Dr. Lakshmi Legaspi , assistant regional director sa DOH nikompirmar sa Banat News nga wala pa siya nakadawat sa maong reklamo apan andam sila mohatag og pagtagad niini.  (Decemay Padilla ug Rowena Capistrano/EIM)(BANAT NEWS)