Salisi Gang bantayan sa APEC

CEBU, Philippines - Gibanabana nga 1,200 ka polis ang 24-oras nga madestino sa dakbayan sa Mandaue alang sa pagbantay sa mga delegado ug mga bisita nga kuyog atol sa Asian Pacific Economic Cooperation (APEC) Summit sunod buwan.

Si Senior Supt. Mariano Natuel, officer-in-charge sa Mandaue City Police Office (MCPO), nagkanayon nga ang kapin 400 niya ka sakop dili mahimo’ng mobiya sa naandan nga gimbuhaton.

Kini ang hinungdan nagkanayon nga ang Police Regional Office-7 mopadala og augmentation force gikan sa Region 8 ug 6 nga mokabat sa 600 ka police personnel.

Nangita pa sila karon og mga lugar nga mahimo’ng kapuy-an sa mao’ng mga polis.

Matud ni Natuel nga ang mga dalan sa dakbayan nga agian sa mga delegado ang ila’ng bantayan batok sa mga dautang elemento.

Si Chief Inspector Michael Anthony Bastes, hepe sa Investigation and Detective Management Branch sa MCPO, niingon nga nagpadayun karon sila sa pagpalig-on sa intelligence gathering sa pag-ila sa mga dautang elemento nga moanhi dinhi sa Sugbo atol sa kalihukan.

Matud ni Bastes nga ang mga sakop sa Salisi Gang nga nakabiktima sa usa ka manager nga babaye ug ingon man sa dakbayan sa Lapu-Lapu ang nailhan na nila sa video footage.

Dugang ni Bastes nga kini gilangkuban sa lima ka tawo nga naglakip sa tulo ka lalaki ug duha ka babaye.

Ang usa sa duha ka babaye nga kauban sa grupo magpayong atol sa paghimo sa krimen ug magbuwag kini sa pagpanglakaw human makabiktima.

Awhag ni Bastes nga i-lock gyud kanunay ang pultahan sa mga sakyanan ug dili makig-estorya sa mga tawo nga dili kaila aron dili mabiktima sa bisan unsa’ng modus. - /GMR (BANAT NEWS)