Demolisyon sa doña pepang ipahunong

CEBU, Philippines – Ipasuspenso sa konseho sa siyudad sa Sugbo ang demolisyon sa mga balay atubangan sa Doña Pepang Cemetery sa barangay Carreta.

Sa resolusyon ni Konsehal Alvin Dizon, giawhag niya ang mayor ug ang Prevention, Restoration, Order, Beautification, and Enhancement nga isuspenso una ang demolisyon sa 40 ka pamilya samtang wala pa’y relocation site nga gitagana.

Si Dizon, chairman sa committee on housing sa konseho, niawhag sab sa Division for the Welfare of the Urban Poor nga magpahigayun og consultation sa mga apektado’ng pamilya aron hisgutan ang re-blocking ug dili ang demolisyon.

Una na’ng nipagawas og pamahayag si Mayor Michael Rama nga ipadayun ang development work sa sementeryo human gibasura sa korte ang kaso nga gipasaka ni kanhi mayor Tomas Osmeña nga nangayo og temporary restraining order.

Dugay na nga plano sa siyudad ang paghimo sa sementeryo nga Heritage Park.

Matud sa pangulo sa DWUP, Collin Rosell, nga dili mawad-an og pinuy-anan ang mga apektado’ng pamilya kay ibalhin sila sa barangay Lorega-San Miguel bisan og dili unta kini kwalipikado sa socialized housing program sa siyudad.

Niluwat na og 10-day notice ang PROBE niadto’ng Hulyo 14 ngadto sa 40 ka pamilya nga apektado sa demolisyon.

Gikatakda na ugma ang demolisyon. Karong Agosto 5, mopahigayun og executive session ang konseho aron hisgutan ang plano sa siyudad.

Patambungon sa sesyon ang DWUP, PROBE, mga opisyal sa barangay Carreta ug Tejero ug ang apektado’ng mga pamilya. – /GMR) (BANAT NEWS)