CITRASCO planong paubsan og P.50 ang pletihan
CEBU, Philippines – Gihangop sa Land Transportation Franchising and Regulatory Board (LTFRB)-7 ang plano sa Cebu Integrated Transport Service Multi-purpose Cooperative(CITRASCO) nga moduso og petisyon alang na sa pagus-os sa pletihan. Matud sa OIC Regional Director sa LTFRB-7 Reynaldo Elnar gipaabot nila ang maong petisyon aron ila dayong iduso sa ilang central Office.
Gikan didto huwaton nga hatagan sila og go signal nga mopahigayon og public hearing labot niini.
Gihulagway sa ahensiya bisan og duna nay 50 sentimos nga us-os sa pletihan human mi-file og fare reduction petition si kanhi konsehal Agustus ‘Jun’ Pe mahimo gihapong dunay laing pagkunhod sa pletihan nga ipatuman tungod kay provisional ra man kadto.
Sigon sa tsirman sa CITRASCO nga si Benjamin Yu ning tungura nanguha pa sila og dugang impormasyon aron mahibaw-an kun pila g’yud ang ilang pagus-os sa pletihan.
Gikatakda pa usab silang makigkita sa board sa CITRASCO lakip na usab iyang mga kaubanan sa transport sector kun unsa ilang sentimiyento.
Apan gihimug-atan ni Yu nga nakita g’yud nila nga nagkabarato ang presyo sa mga produktong petrolyo.
Base sa website sa Department of Energy sukad gipatuman ang rollback sayo ning tuiga, niabot na og P3.39 ang price adjustment sa matag litro sa gasolina samtang P1.39 sa matag litro sa diesel. – /EIM) (BANAT NEWS)
- Latest
