Priso nanghagis

CEBU, Philippines – Duha ka mga polis nga naglakip sa usa ka opisyal ang naangol human nanghagis ang usa ka piniriso sulod sa selda sa Talamban Police Station, Cebu City sa nakalabay nga gabii.

Kung wala pasiriti og tubig sa bombero ang suspetsadong si Edward Rumpas, 33, sulod sa selda dili pa unta kini mokalma.

Ang mga naangol mao sila si Police Inspector Marissa Basiga ug Police Officer 1 Welgen Llaguno.

Matud ni Police Officer Gringo Muldez ang desk officer sa Talamban Police nga nahinabi sa Banat News si PO1 Llaguno ang nakaangkon og lawom nga samad sa bukton samtang si Basiga ang nakaangkon og samad sa kamot.

Sumala pa ni Muldez nga ilang gidakop sa Brgy. Bacayan si Rumpas kinsa gialarma nga nag-amok ug nagsige og pamato og bato ug botelya sa mga silingan.

Gikatahong duna kini gisumbag ug gituok nga mga drayber sa habal-habal  hinungdan nga gitabangan sa mga tawo ug gi-turnover ngadto sa kapolisan.

Apan samtang nagpaabot ang kapulisan sa mga mopasaka og reklamo batok sa suspetsado gikatahong kalit niining gipanukmag ang mga polis  hinungdan nga gipaslak kini sa prisohan.

Inay nga mokalma, giingong gibuak niini ang inidoro ug ang mga tipaka niini gipanglabay niya sa mga polis hinungdan sa pagkaigo nila ni PO1 Llaguno ug Insp. Basiga.

Ang mga sakop sa Special Weapons and Tactics (SWAT) mitabang sa pagpakalma kaniya apan wala gihapon kini mopatuo ug gilabay hinuon niini og mga tipaka ang mga sakop sa SWAT.

Tungod kay gibutang niini sa peligro iyang kaugalingon ug ang mga polis nakahukom sila nga pasiritan kini og tubig sa bombero nga naa mahimutang tupad sa ilang presinto.

“Pwerting gubota diri sir, naabot g’yud hinuon og wala’y oras ang bombero kay di man makaya sa SWAT,” matud pa ni Muldez.

Sa pagkabuntag nakahukom ang mga naangol nga polis nga pabuhian na lang ang suspetsado kay basin kini hinoon maghikog sulod sa prisohan.

Sa dihang nahinabi sa kapulisan si Rumpas kini miangkon nga nakagamit kini og shabu kauban ang iyang mga higala nga hinungdan nga kini mituyok ang utok ug nanghagis.

“Tulo ra man daw ka hits iya’ng nahimo paggamit nila, mao g’yud to’ng hinungdan nga nawala ‘to siya sa iyang huna-huna,” dugang pa ni Muldez. – /EIM) (BANAT NEWS)