Bargayo magpalansang sa ika-21 ka higayon
CEBU, Philippines - Magpalansang sa ika-21 ka higayon si Gilbert Bargayo karong Biyernes Santo ug karong tuiga adto gihapon himuon sa lungsod sa Tuburan. Kana maoy gikompirmar ni Mayor Aljun Diamante sa lungsod sa Tuburan nga nahinabi sa Banat News.
Matud pa ni Diamante nga adto himuon ang pagpalansang sa Boulevard duol sa terminal sa maong lungsod.
Magsugod ang kalihokan sa alas-9 sa buntag pinaagi sa Via Crucis diin didto subayon ang pagpasakit ug pagkamatay ni Kristo sa krus ug sundan sa Siete Palabras.
Matud pa niya nga ang hangyo lang ni Bargayo nga tabangan siya sa pagpatukod sa iyang kapilya sa dakbayan sa Carcar. Si Bargayo nagpalansang ‘sab sa lungsod sa Tuburan sa miaging tuig ug karon ang ikaduha ka higayon sa iyang pagpalansang sa maong lungsod.
Sa matag higayon nga ilansang siya sa krus matud pa ni Bargayo nga mapamati niya kun unsa ang kasakit nga giagian ni Kristo sa dalan sa kapaitan. (BANAT NEWS)
- Latest
