Chedeng bantayan sa PDRRMO
CEBU, Philippines – Ang kagamhanan sa probinsiya nangandam na sa bagyong Chedeng nga gikatakdang moabot karong adlawa.
Base sa weather advisory no.3 sa PAGASA mga alas 10:00 sa buntag kagahapon si Chedeng nga dunay international name nga “Maysak” ang mata niini nahimutang sa Marianas Islands.
Sa alas 10:00 sa buntag kagahapon si Chedeng nahimutang kini sa 1,820 kilometers (km) sa sidlakang Mindanao.
Si Chedeng dunay gikusgon nga 175 kilometer per hour (kph) duol sa sentro niini ug moabot ngadto sa 210 kph ang unos ug nag-irog sa kasadpan amihanang kasadpan sa gikusgon nga 20 kph.
Base sa report sa PAGASA nga ang bagyo layo pa kini nga makaapekto sa bisan asa nga lugar sa nasud.
Si Chedeng gilauman nga mosulod sa Philippine Area of Responsibility (PAR) karong gabii (Miyerkules) o sa Huwebes sa buntag.
Subay niini, si Gobernador Hilario Davide III, nagkanayon kagahapon nga gimanduan niya ang hepe sa Provincial Disaster and Risk Management Office (PDRMO) nga si Baltazar Tribunalo nga mogama na og mga aksiyon sa pagpangandam.
Matud ni Davide nga moabot o sa dili ang bagyo nganhi sa nasud kinahanglang mangandam, ang PDRRMO mag-estambay na sa ilang buhatan sugod karong adlawa. – /EIM) (BANAT NEWS)
- Latest
