Langyaw’ng hubog nanghawok gipapriso

CEBU, Philippines – Hubog nga langyaw gipapriso human kini misuway’g hawok sa kamot sa maanyag apan minyo na nga silbedora sa usa ka kan-anan didto sa dalan F. Cabahug, Barangay Kasambagan kaniadto’ng Sabado sa gabii.

Si Franke Mcneely, 53, usa ka Amerikano ug kasamtangan nga nagpuyo sa Quezon Street, Barangay Mabolo, dakbayan sa Sugbo, gireklamo sa usa ka April Joy, 23, ingon man sa bana sa babaye nga si Albert Gomez, 24.

Matud ni Inspector Vincent Zozobrado, ang deputy chief sa Mabolo Police Station, nga atol sa pagsikop   kang Mcneely, gipa-examine kini sa Cebu City Medical Center (CCMC) ug nagpositibo sa liquor test.

Matud ni Zozobrado nga gireklamo sa babaye ang langyaw kay nagsige kini og gunit sa iyang bukton ug sa makadaghan nga higayon misulay kini nga mohawok unta kaniya.

Sa pagkakita sa bana sa gihimo sa langyaw, iya kini’ng gibadlong apan gisampalong hinuon sa makatulo ka higayon si Albert hinungdan nga dali kini nga mitawag og panabang sa kapolisan.

“Basin nagtuo siya nga mahimo ra sa atoa nga mohalok sa kamot, mura ba og sa laing nasud nga moingon dayon og “your majesty”, unya kay lahi man ta diri,” matud pa ni Zozobrado.

Hinoon pipila ka oras human gipaslak ang langyaw sa prisohan, nagkasinabot ra ‘sab hinoon ang langyaw ug ang mga mireklamo nga wala na mopadayon pagpasaka ug kaso’ng physical injuries ug acts of lasciviousness. – /RUB) (BANAT NEWS)