Visita Iglesia dry-run sa IEC

CEBU, Philippines – Isip pagpangandam alang sa International Eucharistic Congress nga ipahigayun sa Sugbo sunod tuig, usa ka dry-run sa Visita Iglesia ang himuon karong Huwebes Santo, Abril 2.

Gipahibawo sa secretariat sa IEC 2016 nga dunay pito ka simbahan sa Cebu City ang gitakda nga rota sa tradisyonal nga pagbisita ug paghalad ug pag-ampo sa Semana Santa.

Kini mao ang Our Lady of Sacred Heart Parish sa Escario , Asilo dela Medalla Milagrosa, Redemptorist Parish, Sacred Heart Parish sa D. Jakosalem, Sto. Rosario Parish, Basilica Minore del Sto. Niño de Cebu ug ang Cebu Metropolitan Cathedral.

Dunay giandam nga han-ay’ng pag-ampo ug mga awit ang Cebu Archdiocese kaabag ang matag parokya alang sa mosubay sa maong rota ingon man sa mopabilin sa matag simbahan.

Nakig-alayon na ang mga opisyal sa simbahan ngadto sa kapolisan ug sa City Traffic Operations Management (CITOM) alang sa seguridad ug traffic management.

Sugod sa alas 7:30 sa buntag, buksan ang mga simbahan alang sa Visita Iglesia. Gipahimangnuan ang mga deboto sa pagtabang sa pagseguro nga solemne ug hilum ang mao’ng kalihukan tungod kay ang sentro niini mao man ang pag-ampo, pagpangayo’g pasaylo sa mga kasal-anan, ingon man paghinumdum sa pasakit ug kamatayun ni Hesukristo.

Human sa dry-run, mahibaw-an kung ensakto ba o kinahanglang usbon ang sistema nga ilang nahan-ay. – /GMR) (BANAT NEWS)