49 na ka pusher nadakpan sa MCPO
CEBU, Philippines - Miabot na og 49 ka mga drug pushers ang nadakpan sa Mandaue City Police Office (MCPO) sukad sa bulan sa Enero hangtod sa tungatungang bahin sa Marso niining tuiga.
Si Superintendent Josefino Ligan nga maoy hepe sa City Intelligence Branch sa kapolisan sa maong dakbayan miingon nga sa maong gidaghanon, 31 ka gramos nga shabu nga mokabat sa P376,000 ang ilang nasakmit.
Matud pa ni Ligan nga onse ka operasyon ang ilang nahimo niining tuiga. Ug ang tanan napasakaan na og kaso.
Midugang si Ligan nga karong mosunod nga mga adlaw ilaha pa g’yung hingusgan ang operasyon batok sa ilegal nga drugas.
Si MCPO City Director Petronelli Baldebrin miingon nga si Mayor Jonas Cortes mipadayag og suporta kanila sa mga operasyon pagsumpo sa ilegal nga drugas sa dakbayan.
Sa miaging tuig, ang MCPO nakapahigayon og 155 ka anti-illegal drugs operation nga miresulta usab sa pagkasikop sa 216 ka tawo ug mokabat usab 232 gramong shabu ang ilang nasakmit nga nagkantidad og P2.8 milyones.
Sa 49 ka pushers nga nadakpan karong tuiga, ang unom niini gikan sa Barangay Cambaro ug adunay gikan sa Barangay Opao, Barangay Umapad ug Barangay Looc. (BANAT NEWS)
- Latest
