Duha ka oras nangawat wa’y nakuha

CEBU, Philippines - Gilungkab sa wala pa mailhi’ng kawatan ang staff house sa Villa Del Rio II sa barangay Pit-os, dakbayan sa Sugbo kagahapon sa kadlawon ug nakuha sa close-circuit-television (CCTV) camera sulod sa opisina.

Hinuon ang presidente sa Villa Del Rio Homeowners Association nagdumili sa paghatag sa kopya sa video sa rason nga nagpadayun pa ang imbestigasyon sa kapolisan.

Ang taga PNP Crime Laboratory nga misusi sa lugar niingon nga ala 1:44 sa kadlawon kagahapon nisulod ang kawatan agi sa kisame ug alas 3:53 na nigawas.

Giingo’ng kapin sa duha ka oras nagtuyok-tuyok sa staff house ang kawatan human naglisud pag-abli sa vault diin gibutang ang kuwarta hinungdan nga pakyas sa pagpangawat.

Una’ng gilungkab ang staff house niadto’ng Pebrero 11 ug nakuha ang P14 mil  nga kuwarta. Nagduda ang kapolisan nga suhito ang suspek sa lugar tungod kay nasayud kung diin gibutang ang kwarta ug posible’ng dunay kontak sa sulod.

Ang administrator sa staff house, Jennifer Yano, niingon nga duna na sila’y gidudahan apan dili pa sila makasulti ilabi na nga mihimo pa og imbestigasyon ang kapolisan.

Gumikan sa hitabo gihugtan na ang seguridad ug kada adlaw na ideposito ang ilang kuwarta nga makuha sa mga homeowners ug pabutangan na og guwardiya ang gawas nga bahin sa staff house.

Ang mga trabahante sa staff house ang gipanguhaan na usab og fingerprint sa PNP Crime Laboratory. (Decemay P. Padilla/GMR)(BANAT NEWS)