Haponesa mireklamong gihinol sa masahista

CEBU, Philippines - Usa ka masahista ang gireklamo sa usa ka dalagang Haponesa nga mihikap sa pribadong parte sa iyang lawas samtang siya gimasahe niini sa usa ka massage center didto sa F. Cabahug Street, Barangay Kasambagan ning dakbayan sa Sugbo.

Ang gireklamo mao si Eligeo Labisto, 23, taga Danao, Bohol ug temporaryo nga nagpuyo sa Barangay Lahug dinhi sa siyudad, samtang ang reklamante usa ka 26 anyos nga Haponesa.

Atol sa maong hitabo kauban sa Haponesa ang iyang uyab nga naa sa pikas cubicle nga gisalipdan lang og kurtina.

Sumala pa sa hepe sa Mabolo Police nga si Senior Inspector Hartzel Bellido mialegar ang Haponesa nga gihuboan siya og underwear sa suspek ug gihinol og apil ang pribadong bahin sa iyang lawas bisan gipasidan-an ang suspek nga dili kini hikapon og apil. Apan ang suspek sa iyang bahin mihimakak sa alegasyon sa maong langyaw, matud niya wala niya hikapa ug kun natandog man wa kini matuyo.

Nahibulong usab ang kauban ni Labisto kun nganong pagkahuman na sa sesyon (usa ka oras) una pa mireklamo ang maong langyaw.

Ang maong  kaso gipasa na sa Women’s and Children and Protection Desk.  (BANAT NEWS)