Gica gusto’ng masuspenso na si Garcia

CEBU, Philippines - Giawhag ni Bise Mayor Efren Gica sa lungsod sa Dumanjug ang hunta probinsiyal nga ipatuman na ang pagsuspenso kang Mayor Nelson Garcia sulod sa unom ka buwan.

Si Gica niduso og motion for execution niadtong Marso 18, 2015.

Niadto’ng Marso 9 gikombikto sa hunta probinsiyal si Garcia sa kaso’ng grave abuse of authority ug grave misconduct nga gipasaka ni Gica nunot sa pagtudlo og secretary sa Sangguniang Bayan.

Apan si Garcia may 30 ka adlaw pa sa pag-apelar ngadto sa Office of the President.

Niadto’ng Marso 24, si Gica niduso sab og supplemental motion for execution nga nag-awhag sa pagpatuman  na sa pagsuspenso kang Garcia. (BANAT NEWS)