Kaslonon nga pusher nadakpan
CEBU, Philippines - Nameligrong di mahinayon ang kaminyoon sa usa ka gidudahang level 3 drug pusher human nasikop sa mga sakop sa City Intelligence Branch sa Cebu City Police Office diha sa Sitio Mahayahay, Barangay Calamba. Giila ang dinakpan nga si Ohrlievee Villanueva Rama, 26, alyas Butong, nagpuyo sa maong lugar ug gikatahong sinaligan ug runner sa usa ka bigtime drug personality dinhi sa dakbayan.
Matud pa ni Superintendent Romeo Santander ang hepe sa CIB nga duna’y nagpahibalo kanila kabahin sa ilegal nga negosyo ni Rama hinungdan nga ila kini nga gipanid-an sulod sa duha ka adlaw ug gi-buy bust gamit ang P300 nga marked money.
Atol sa pagsikop sa kapulisan nakuha gikan kaniya ang dugang 50 ka gagmay nga pakete sa gituohang shabu nga mikantidad og P35,000.
Sa pakighinabi sa Banat News ni Rama kini miingon nga gikatakda unta kini nga kaslon karong Mayo 18, apan daw sa dili na kini madayon human kini nasikop.
Sumala pa ni Rama nga halos napulo na sila ka tuig nga manag-uyab sa babaye nga iya unta nga pakaslan ug nakaandam na ang tanan. “Unsaon napriso man ko, wala man ta’y pang piyansa, mura’g dili na g’yud ni madayon,” matud pa ni Rama. Wala ‘sab moangkon si Rama sa gipasangil sa kapulisan kaniya ug miingon nga dili iyaha ang nakuha nga shabu.
Apan si Santander miingon nga base sa ilang monitoring nalambigit g’yud sa ilegal nga kalihokan ang dinakpan. (BANAT NEWS)
- Latest
