Buhing Kalbaryo giandaman
CEBU, Philippines – Padayun ang pagbansay-bansay sa kabatan-onan sa lain na usab nga pagpahigayun sa Buhing Kalbaryo karong Biyernes Santo.
Kagahapon gilusad ang ika-18 nga produksiyon sa Buhing Kalbaryo diin nipasundayag ang pipila sa 145 ka casts og usa ka dula kabahin sa pagpasakit ug pagpalansang sa krus sa Ginoong Hesukristo.
Matud ni George Chu, project director, nga tibuok buwan ang ila’ng preparasyon aron mas mapanindot pa kini.
“This is our way to bring people closer to God,” sumala pa niya.
Si Mayor Michael Rama nipahimangno sa mga entrante sa Buhing Kalbaryo nga lig-onon sab ang ilang pagtuo ug pasyon.
“To attain complete conversion, you have to have passion aside from talent,” sigun niya.
Ang Buhing Kalbaryo usa ka buhi’ng pasundayag sa pasyon ug pagkamatay sa krus sa Ginoo diin sugdan sa San Nicolas Parish grounds ug humnon sa Guadalupe Church plaza diin himuon ang paglansang sa krus kang Kristo.
Ubang kalihukan sa Semana Santa sa dakbayan sa Sugbo mao ang passion play sa Fort San Pedro sa Marso 25 ug 26 sa alas 7:00 hangtud alas 9:00 sa gabii; Palm Sunday-Walk gikan sa V. Rama hangtud Guadalupe Church sa Marso 29 sa alas 5:30 sa buntag; Buhing Kalbaryo Presentation sa San Nicolas Parish Grounds hangtud Guadalupe Church sa Abril 3 sa alas 10:30 sa buntag; Sugat sa Guadalupe 2015 sa Abril 4 sa alas 12 sa tunga’ng gabii ug Traditional Sugat Presentation ug Easter Presentation sa Abril 5 sa alas 2 sa kadlawon. – /GMR) (BANAT NEWS)
- Latest
