Wa’y overloading sa bus sa Semana Santa
CEBU, Philippines – Gibalibaran sa Land Transportation Office ang hangyo sa Ceres Bus Company ug mga mini-bus kabahin sa overloading panahon sa Semana Santa.
Sa tigum sa Kapitolyo tali sa LTO ug Land Transportation Franchising Regulatory Board (LTFRB), ang mga bus operators nihangyo nga tugutan sila’ng maka-overload bisan 10 ngadto sa 15 lang ka pasahero aron makabawi sa ila’ng biyahe.
Gipasabot nila’ng Elinore Zafra, representante sa mini-bus operators ug Carmelo Palasan, branch manager sa Ceres Bus Company, nga inig paingon sa habagatan gikan sa Cebu South Bus Terminal (CSBT), daghan kaayo’ng pasahero apan inig balik nila sa dakbayan sa Sugbo wala na’y pasahero ug alkanse na sa biyahe.
Apan si Joel Maloloy-on, chief operation sa LTO-7, wala motugot sa hangyo ni Zafra ug Palasan.
Gipasabot ni Maloloy-on ila’ng gilantaw ang safety sa mga pasahero.
Ang LTO mopakatap og mga personnel pagseguro nga wala’y molapas sa balaud sa trapiko ug magpahigayun sila og “road worthiness checks” sa mga bus.
Ang information officer sa LTFRB-7, Eugenio Ibo, nipahibawo nga sugod niadto’ng Lunes nag-isyu na sila og special permit sa mga bus nga molabyog gawas sa ilang rota. – /GMR) (BANAT NEWS)
- Latest
