Walo ka tulisan kasohan karong adlawa
CEBU, Philippines – Ipasaka karong adlawa ang mga kasong carnapping, robbery ug illegal possession of firearms batok sa walo ka mga suspetsado nga nitulis sa usa ka babayeng negosyante diha sa dakbayan sa Lapu-Lapu City niadtong adlaw nga Domingo.
Matud ni Police Inspector Zenaido Pastorfide, hepe sa Crime Against Property Desk sa Lapu-Lapu City Police Office nga apil sa ilang pasakaan og kaso ang 27-anyos nga kakunsabo sa grupo nga si Joy Chan.
Dugang ni Pastorfide, bisan miangkon si Chan sa iyahang kalambigitan sa maong krimen apan ang korte na maoy padesisyonon kun gamiton ba siyang state witness batok sa grupo.
Ang mga kauban ni Chan nga pasakaan og kaso mao sila si Rodrigo Boyles, Khent Colanggo, Gary Jaylo, Jericho John Francisco, Ritchie Signar, Rudy Adaya ug si Christopher Viña. Silang tanan pulos gitanggong sa Lapu-Lapu City Detention Cell. Ang grupo mitulis unta sa casino financier nga si Marites Amit , residente sa Deca 4 sa Barangay Bankal kaniadtong miaging Sabado sa gabii.
Gipanggaid sa mga tulisan ang mga biktima ug gidala ang P682,000 nga kwarta, mga alahas, mga mahalong bag ug gadgets nga mikabat og P4.9 milyones ug gidala ang usa ka black Mitsubishi Montero Sport (YLB-565) sa ilang pag-ikyas. – /EIM) (BANAT NEWS)
- Latest
