Bana nagpakuryente patay

CEBU, Philippines – Patay ang usa ka bana human naghikog pinaagi sa pagpakuryente sa Maghaway, dakbayan sa Talisay ug nadiskubrehan pasado alas 6 sa nakalabay nga buntag.

Ang namatay naila nga si Joseph Barliso, 33, construction worker ug may kapuyo sa maong lugar.

Nahitabo ang insidente sa balay sa iyang bayaw nga iyang gitrabahoan.

Matud ni PO3 Jason Del Campo, usa sa mga nakaresponde sa mao’ng hitabo, nga halos tulo na ka semana nga wala mouli sa ilang balay si Barliso nga gikasab-an sa iyang asawa kay wala nakahatag sa sweldo ug didto na puyo sa balay nga iya’ng gitrabaho.

Katapusang nakita nga buhi si Barliso pasado alas 10 sa nakalabay nga gabii nga nakigtagay og ilimnong makahubog sa usa ka tindahan.

Pagka-buntag nakit-an na lang sa tag-iya sa balay nga si Edgar Bayarcal nga nipilit ug naghigda na sa taas sa kisame si Barliso nga napuno sa paso ang kamot.

Sa imbestigasyon nasayran nga nikatkat sa kisame si Barliso ug gipanitan ang live wire sa kisame, gipapaakan og pliers dayun gihawiran hinungdan nga nakuryentehan.

Nakuha sa kapolisan sa crime scene ang usa ka gunting ug usa ka pliers nga gituohang gigamit sa namatay. – /GMR) (BANAT NEWS)