Tulo sikop sa buy-bust

CEBU, Philippines – Nadakpan ang tulo ka tawo sa managlahi’ng operasyon sa kapolisan sa lungsod sa Liloan ug Medellin diin duha ang nasakmitan og shabu ug ang laing usa nadakpan tungod sa pagmaneho og motorsiklo nga wala’y lisensiya.

Si  Police Officer 3 Jesson Gayo sa Liloan Police Station  miingon nga gipangulohan sa ilang hepe nga si Senior Inspector Ramil Morpos ang pagpatrolya sa palibot sa ilang lungsod alas 10 pasado sa gabii ug ilang nasigpatan sa sitio Dapdap, Catarman ang motorsiklo nga giluwanan sa duha ka tawo nga wala’y plate number.

Gipahunong nila ni Morpos ang motorsiklo ug nailhan ang sakay nga sila si Jimboy Jamito, 19, taga Tayud ug Geromy John Baguio, 30, taga Purok Molave, Tayud, sa nahisgutang lungsod.

Napakyas sa pagpakita og lisensiya sa pagmaneho sa motorsiklo si Jamito hinungdan nga gidakop ug sa pagrekisa nga gihimo kang Baguio mao’y nakuha ang duha ka pakete’ng shabu ug mga drug paraphernalia hinungdan nga lakip sa gidakop.

Dugang nadakpan mao si Benjie Pepito Setenta, 30, taga Poblacion, lungsod sa Medellin kinsa nasakmitan usab og usa ka pakete’ng shabu sa buy-bust nga gihimo sa kapolisan.

Si Senior Police Officer 1 Ryan Castro sa Medellin Police Station niingon nga ang dinakpan mao usab ang suspek sa nahitabo’ng pagpamusil ug pagpangulata sayo sa gabii sa gipahigayun nga disco sa maong lugar.

Ang biktima sa pagpamusil mao si Ignacio Pasigay Lepiten, 21, nga nakabaton og samad pinusilan sa bukton ug si James Sumbise, 21, nagpuyo sa maong dapit mao usab ang biktima sa pagpangulata.

Si Castro niingon nga diha’ng ilang gidakop ang suspek nakahigayun pa kini pag-ambak sa pangpang ug nisutoy na unta pagdagan apan gisugat sa nag-atang nga mga polis hinungdan nga nadakpan.

Sa pagrekisa maoy nakuha ang usa ka pakete’ng shabu, cellphone ug nakuha usab ang P200 nga kwarta.

Ang maong dinakpan nga nakabaton og mga bun-og sa kalawasan sa pag-ambak sa pangpang ang gidala sa tambalanan apan human sa pagtambal ilang gibalhug sa detention cell. – /GMR) (BANAT NEWS)